معنى الرموز الموجودة على عبوات التجميل مثل الشامبو و بلسم و كريم الشعر

تعرفوا على أهم ست رموز بيتحطوا على عبوات مستحضرات التجميل
------------------------------------------------------
بمجرد ما بتشتروا عبوة شامبو أو بلسم أو كريم للشعر هيلفت انتباهكم أيقونات رمزية مرسومة على المنتجات دي .

كل أيقونة عبارة عن رسم رمزي له دلالة و الرموز دي بتختصر كلام كتير وبتوصل الرسالة بشكل أسرع من الكتابة .

..............................................

في منشورنا النهاردة جمعنا أغلب الأيقونات الرمزية وهنشرحلكم معانيها بترتيب الأرقام على الصورة المرفقة.

1- رمز الأرنب بيوجه رسالة للمستخدمين إن المنتج الي بين إيدكم ، مسالم وكيوت و الشركة مجربتوش على الحيوانات المغلوب على أمرها ودي رسالة تسويقية لكسب تعاطف المستخدمين.

منتجات التجميل بتحتاج تمر باختبار للسلامة و الأمان عشان كده الشركات بتجربها على حيوانات صغيرة زي الأرانب وغيرها من الحيوانات التانية.

2- دايرة محيطة بثلاث حروف إنجليزية UVA ودي اختصار لجملة
Ultra violet A
وهي النوع ألف من الأشعة البنفسجية

هتلاقوا الأيقونة دي على عبوات الصن بلوك أو منتجات الوقاية من أشعة الشمس ، أغلب المنتجات دي بتدي حماية من الأشعة فوق البنفسجية باء UVB وكون المنتج عليه علامة UVA معناه إنه واسع المجال بيحمي من الأشعة بأنواعها الإتنين ألف و باء .

3- دايرة /مثلث التدوير
معناها إن العبوات قابلة للتدوير أو إشارة لنوع العبوات المستخدمة وجودتها

4- كتاب وكف الإيد
بيستخدم الرمز ده لو كان في معلومات تانية وتفاصيل أشمل غير المكتوبة على العبوة ، محطوطة في مكان تاني مع المنتج ، زي نشرة داخلية أو كتيب مدمج .

5- الساعة الرملية و برطمان داخله رقم

* حسب المواصفات الأوروبية فأي منتج من منتجات العناية الشخصية وبتكون صلاحيته أقل من 30 شهر لازم يتحط عليه تاريخ صلاحية أو يستخدم قبل تاريخ كذا BBE
Best before end of ... و هنا بيتم استخدام أيقونة الساعة الرملية

* أما لو كان المنتج بصلاحية أكتر من 30 شهر فلازم يتحدد عليه مدة صلاحيته بعد ما بيتم فتحه
PAO
Period after opening

ودي بيرمز لها ببرطمان وجواه رقم ، الرقم ده هو عدد الشهور بعد الفتح

فلو كان الرقم الي جوا البرطمان 12 ده معناه إن المنتج صالح لمدة 12 شهر من تاريخ فتح العبوة

6- حرف ال e
ودي اختصار لكلمة exact أو إشارة للكمية الصافية من المنتج داخل العبوة net content
فلما تقروا جملة
100 ml e
معناها
100 ml exact
أو
100 ml each
يعني لكل عبوة

---------------------
لو أنت مستهلك بس لمنتجات الشامبو و البلسم و الصابون ، شير للبوست وعرف غيرك

لو أنت من صناع منتجات العناية الشخصية ، استخدم الأيقونة المناسبة لشغلك واكتبلنا في كومنت رأيك .

#صحصح_معلوماتك