قصة الشهيد رامي حسنين رحمه الله و الكلب الأبيض

#الشهيد_رامي_حسنين
#قصة_الكلب_الابيض
القصة دي حكتها لي زوجة الشهيد رامي في مكالمة تليفونية اثناء تحقيق كنت باعمله عن الشهداء .. ومن كتر الوجع والقصص العجيبة اللي سمعتها عن هؤلاء الرجال .. مقدرتش اكمل في النوع ده من التحقيقات ..

حكت لي عن آخر أجازة للشهيد رامي .. لما روح البيت ولقي جنب عربيته كلب ابيض قاعد جنب العربية .. ومابيمشيش.

وكان اول ما يشوف رامي .. يقوم يقف زي اللي بيضرب له تعظيم سلام .. وفضل طول الأجازة واقف تحت البيت جنب عربية رامي ومابيتحركش من جنبها. لدرجة ان زوجته كانت عاوزة حاجة من العربية الكلب وقف ومارضاش يخليها تهوب ناحيتها .. لحد ما رامي طلع بنفسه مشاه من جنب العربية !

كان رامي بيبص للكلب ويقول لها الكلب ده جاي لي .. وهي تقول له ماتركزش .. ده كلب من الشارع يعني واول مرة نشوفه..!
يقول لها لا .. ده كلب ابيض مش شكل كلاب الشارع.

ولما خلصت الاجازة وسافر رامي .. اتصل بزوجته قال لها.. بصي من البلكونة شوفي الكلب واقف تحت ولا مشي؟!
وفعلا بصت من البلكونة.. وكانت المفاجأة اللي اذهلتها ..
انها مالقيتش الكلب..!!
ومع ذلك .. خوفا عليه من التوتر والقلق.. قالت له ان الكلب موجود تحت..!!
المفاجأة الاكبر كانت في رده عليها .. قال لها لا.. الكلب مش عندك .. الكلب عندي هنا في سينا .. جيت لقيته هنا .. هو نفس الكلب..!!
من ساعتها وهو كان عارف ان دوره جاء .. علشان كده طلع بعربية الاول ورفض ان طه يركب معاه.. !!

ماهو محدش يقنعني ان دول مش شهداء ومكانوش شايفين مقاعدهم في الجنة قبل ما يستشهدوا ولا كانوا شامين ريحتها وشايفين الملائكة اللي حواليهم..!!
وان هشام عشماوي ورفاعي وعماد وأمثالهم.. وهم بيموتوا هم اللي كانوا ببشموا ريحة الجنة وشايفين الحور العين..!!

فرق كبير بين اللي بيستشهد علشان بلده تعيش في أمان ويدافع عن ارضه وعرضه.. وبين اللي بيستشهد علشان يطلع يقابل الحور العين ويكمل نص دينه مع حوريات الجنة رغم انه ضيع دينه كله قبل ما يموت !!

#الاختيار

#جيهان_الشعراوي
Gehan Al Shaerawy