هل تعرف حكاية المثل الشعبي الشهير عند ام ترتر ؟

  أم ترتر....

نفوسه الشهيره ب "أم ترتر" كانت ساكنه فى حوارى كرموز ومعروف عنها إنها لامؤاخذه ست لسانها طويل ومفتريه وفى فرش الملاية مالهاش مثيل  .. 

أم ترتر مخلفتش ترتر.. عندها اسماعيل وابراهيم ونبويه... ترتر اسم شهره لأنها كانت عايقه بتلبس جلاليب ومنديل بترتر عشان كدا سموها أم ترتر وجوزها المعلم علوان أبو اسماعيل "عربجى حنطور "..

أم ترتر كانت ست بيت شاطرة، ساكنه فى بيت دور واحد، منه بيت وعربخانه لحصان وعربيه المعلم علوان، والبيوت اللى حواليها دورين وثلاته وعامله فوق السطح مزرعة فراخ وبط وكلهم "برابر " مافيش ولا ديك ولا دكر بط .. و سايباهم سارحين ع السطح يلاغوا فى ديوك ودكورة بط الجيران وزى ما قالوا "ومن الحب ما قتل حتى فى الفراخ والبط" ديوك الجيران كانت تنط على سطح أم ترتر عشان الفراخ, الديك اللى ينط أو دكر البط  على سطح أم ترتر مفقود ياولدى وعلى طول يبقى اجدع عشوة للمعلم علوان!! وكانت خبرة فى اخفاء اثر الديك من ريش وخلافه واللى كان يضيع لها ديك وتسأل الجيران يردوا عليها بصوت واطى "عند أم ترتر ربنا يعوض عليكى" عشان أم ترتر لو سمعت هتخلى فرده الشبشب اعلى منهم... مش بقولكوا كانت مفتريه، كانت ريا وسكينه الفراخ .. 

■وطلع المثل الشعبى "عند أم ترتر" يدل على أستحاله إنك تلاقى اللى بتدورى عليه رغم إنك بتبقى عارفه ومتأكده مين اللى خده ...!!!!

يا تري إنتى تعرفى كام "أم ترتر" ؟!!! 😂😂