نصائح لكل من يريد عمل شنطة رمضان هذا العام

●إن شاء الله إللي ناويين يعملوا شنط رمضان..
نصائح من واقع تجارب السنين اللي فاتت
دي اجتهادات شخصية تحتمل الخطأ قبل الصواب.. إحنا بنجتهد وعلى الله القبول🤲👇👇

١- اوعى تنسى البروتين الحيواني.. فراخ ولحمة... لو امكانياتك ما تسمحش تعمل شنطة فيها فراخ.... بلاش شنطة جافة خالص ووزع على كل أسرة فرختين..
كراتين كارفور وشنط رمضان اللي ب ١٠٠ و ١٢٠ جنيه معظمها من غير فراخ..
الأسرة بيبقى عندها ١٠ كيلو رز و٣٠ كيس مكرونة ومفيش فرخة في الثلاجة😔

٢- حاول تزود الكميات على حساب عدد الأصناف... ما تفرحش بالشنطة اللي فيها نص كيلو عدس ونص كيلو فاصوليا..العدس انواع ودرجات والبقوليات كذلك... الأسرة الكبيرة هتضطر تشتري نص كيلو كمان عشان تكمل الوجبة وممكن يبقى نوع مختلف في التسوية مثلا ويبوظ الأكلة.

٣- الأقربون أولى بالمعروف👌👌

٤- اللوبيا مش محبوبة للأسر... دي نتيجة توصلنالها بعد ما عملنا استفتاء ل ١٠٠ أسرة بنوزع عليهم الإطعام شهرياً... الأسر طلبوا اننا نشيل اللوبيا ونحط مكانه عدس بجبة أو عدس عادي.

٥- الفول .. سحور رمضان .. مشكلته بس انه بياخد وقت طويل عشان يستوي.. هيخلص نص الأنبوبة ...بس لا غنى عنه في رمضان.

٦- بلاش الرز الرخيص المرهق في تنظيفه .. بلاش كيس المكرونة ابو ٣ جنيه....بلاش تسترخصوا في المكونات..هات كأنك بتجيب لبيتك.. لن تنالوا البر حتى تنفقوا مما تحبون.

٧- كيس ملح في كل شنطة.. هتقولي يعني هما مش هيعرفوا يشتروا كيس ملح ابو جنيه ؟؟ هقولك لا هيشتروا.
بس الشنطة هتخلص في يومين وكيس الملح هيقعد اسبوعين.. وهيدخل في كل طبخة... وكل رشة ملح بحسنة إن شاء الله و (اللهم تقبل🤲).

٨- اللحمة..الله لو تقدر تحط كيلو لحمة أو توزع لحمة بس..اللحمة دلوقت أصبحت غالية وأسر كتير نفسها فيها وما بتقدرش تشتريها.

٩- لو هتحط قمر الدين من باب الإحسان بلاش قمر الدين المصري ابو ١٠ جنيه.. ده مياه ملونة بسكر... قمر الدين النضيف غالي... اللفة فوق ال ٢٠ جنيه... شاور نفسك بقى تحط لفة قمر الدين أو ٢ كيلو رز براحتك.. دي مدرسة أولويات وكل واحد ومدرسته

١٠- الفراخ الفراخ الفراخ....

١١- لن تنالوا البر حتى تنفقوا مما تحبون♥️

١٢- لو قدرت تعمل حصر بعدد أفراد كل أسرة وتحاول تطبق العدل هتبقى حاجة جميلة..لو قررت تتحرى العدل في التوزيع انظر ل رقم ١٣👀👇

١٣- بلاش ترهق نفسك بعمل نوعين شنط كبير وصغير... اعمل شنطة واحدة صغيرة والأسر الكبيرة تاخد شنطتين..ده اسهل في التوزيع والتعبئة والعدد والحصر.

١٤- حاول تفتكر الأطفال بحاجة في الشنطة..الطفل مش هيفرح بالرز والفراخ..هيفرح بعلبة البسكويت اللي ب ١٠ جنيه فرحه الاطفال بتسعد القلب 😍🥰

١٥- افتكر إن ده شهر في السنة..حتى لو الأسرة اخذت ١٠ شنط فهو شهر الخير.. بيستنوه من السنة للسنة عشان يخزنوا حبة حاجات يعيشوا عليهم شهرين كمان بعد رمضان👌

من تجربتي أحب اجيب أكل يكفي عدد اسر اقل بس يكون مش هيحتاجوا حاجه بعده و (لن تنالو البر حتي تنفقوا مما تحبون) ‼